लोणावळा: राष्ट्रवादी काँग्रेस पक्षाने आगामी निवडणुका लक्षात घेता संघटनात्मक बांधणीला सुरुवात केली आहे. याच अंतर्गत, लोणावळा शहर आणि ग्रामीण भागासाठी राष्ट्रवादी विद्यार्थी काँग्रेसचे माजी अध्यक्ष अमोल केदारी यांची बुथ अध्यक्षपदी निवड करण्यात आली आहे.
मागील काही वर्षांपासून अमोल केदारी हे पक्षासाठी सक्रियपणे कार्यरत आहेत. २०१६-१७ च्या जिल्हा परिषद आणि लोणावळा नगरपालिकेच्या निवडणुकांमध्ये त्यांनी केलेल्या कामाची आणि त्यांच्या चांगल्या जनसंपर्काची दखल घेऊन ही जबाबदारी त्यांच्यावर सोपवण्यात आली आहे. आमदार सुनील आण्णा शेळके यांचे निकटवर्तीय आणि तालुकाध्यक्ष गणेश खांडगे यांचे विश्वासू सहकारी म्हणून केदारी यांची ओळख आहे.
आगामी लोणावळा नगर पालिका आणि जिल्हा परिषद निवडणुकांमध्ये पक्षाला अधिक बळकटी देण्यासाठी केदारी यांच्यावर ही महत्त्वपूर्ण जबाबदारी देण्यात आल्याचे तालुकाध्यक्ष गणेश खांडगे यांनी सांगितले. बुथ पातळीवर प्रभावीपणे काम करून पक्षाची पकड मजबूत करणे हे या निवडीमागचे प्रमुख उद्दिष्ट आहे.
या वेळी निवड जाहीर करताना तालुकाध्यक्ष गणेश खांडगे यांच्यासह एकविरा देवस्थानचे अध्यक्ष दीपक हुलावळे, खरेदी-विक्री संघाचे माजी चेअरमन बाळासाहेब भानुसघरे, संचालक भरत येवले, किरण हुलावळे, ठेकेदार संघाचे अध्यक्ष सुरेश कडू, संतोष राऊत आदी मान्यवर उपस्थित होते.
