दिवाळी मार्केटमध्ये विक्रमी ३०,००० नागरिकांची उपस्थिती; ६० लाखांची उलाढाल
लोणावळा: ‘लोणावळा वुमन्स फाउंडेशन’ने आयोजित केलेल्या ‘दिवाळी मार्केट २०२५’ ला लोणावळा आणि आसपासच्या नागरिकांनी भरभरून प्रतिसाद दिला आहे. ११ आणि १२ ऑक्टोबर रोजी कुमार रिसॉर्ट, लोणावळा येथे झालेल्या या दोन दिवसीय भव्य उपक्रमाने नागरिकांचे लक्ष वेधून घेतले. फाउंडेशनच्या ‘व्होकल फॉर लोकल’ आणि महिला सक्षमीकरणाच्या ध्येयाला नागरिकांनी दिलेल्या प्रचंड पाठिंब्यामुळे तब्बल ३०,००० हून अधिक लोकांनी या मार्केटला भेट दिली, ज्यामुळे ६० लाखांहून अधिक रुपयांची विक्रमी उलाढाल झाली.
दिवाळीच्या खरेदीसाठी आणि स्थानिक कलाकारांना व महिला उद्योजकांना प्रोत्साहन देण्यासाठी आयोजित करण्यात आलेल्या या मार्केटमध्ये सकाळी १० ते रात्री १० पर्यंत खरेदीसाठी लोकांची लगबग पाहायला मिळाली. फॅशन, ज्वेलरी, आकर्षक घरसजावटीच्या वस्तू, दिवाळीचा स्वादिष्ट फराळ, हाताने बनवलेली (हँडमेड) उत्पादने, तसेच लहान मुलांसाठी खास खेळ आणि मनोरंजनाचे स्टॉल्स या मार्केटचे मुख्य आकर्षण ठरले. याशिवाय, खवय्यांसाठी खास ‘फूड झोन’ आणि दररोजचे ‘लकी ड्रॉ’ उपस्थितांच्या उत्साहात भर घालत होते.
महिलांना आर्थिकदृष्ट्या सक्षम बनवण्याचे आणि त्यांच्या कौशल्याला योग्य व्यासपीठ मिळवून देण्याचे ध्येय घेऊन कार्यरत असलेल्या लोणावळा वुमन्स फाउंडेशनचा हा उपक्रम अतिशय यशस्वी ठरला.
फाउंडेशनच्या संस्थापक अध्यक्षा सौ. ब्रिंदा अनिश गणात्रा यांनी या प्रचंड यशानंतर समाधान व्यक्त केले. त्या म्हणाल्या, “या वर्षी दिवाळी मार्केटला नागरिकांकडून मिळालेला प्रतिसाद केवळ अभूतपूर्व आहे. महिलांनी आणि स्थानिक उद्योजकांनी मोठ्या संख्येने सहभाग नोंदवला, ही खूप आनंदाची बाब आहे. त्यांच्या कला, उत्पादने आणि आत्मविश्वासाला मिळालेलं हे व्यासपीठ आमच्यासाठी खूप प्रेरणादायी आहे. या उपक्रमातून ‘व्होकल फॉर लोकल’ या संकल्पनेला निश्चितच नवी गती मिळाली आहे.”
या विक्रमी यशानंतर, लोणावळा वुमन्स फाउंडेशनने यापुढेही महिला आणि स्थानिक उद्योजकांना पाठिंबा देण्यासाठी अशा आणखी महत्त्वपूर्ण उपक्रमांचे आयोजन करण्याचा संकल्प केला आहे.
